மட்டக்களப்பு, நெடியமடு பகுதியில் பாலம் அமைக்கும் பணிக்காக நீர் எடுப்பதற்காகத் தோண்டப்பட்டிருந்த பாதுகாப்பற்ற பாரிய குழியில் தவறி விழுந்து 6 வயது சிறுவன் ஒருவர் பரிதாபமாக உயிரிழந்துள்ளார்.இந்தச் சம்பவம் நேற்று (04) முற்பகல் 11.00 மணியளவில் இடம்பெற்றுள்ளதாக ஆயித்தியமலை பொலிஸார் தெரிவித்துள்ளனர்.நெடியமடு பகுதியைச் சேர்ந்த நாகராசா நவதீப் என்ற 6 வயது சிறுவனே உயிரிழந்துள்ளார்.ஆயித்தியமலை பொலிஸ் பிரிவுக்குட்பட்ட 6ஆம் கட்டை என அழைக்கப்படும் பகுதியில், நெடியமடு பாடசாலைக்கு எதிர்ப்புறமாக உன்னிச்சைக் குளத்திலிருந்து வயல் பகுதிக்குச் செல்லும் ஆற்றின் குறுக்கே நீர்ப்பாசன திணைக்களத்தினால் பாலம் அமைக்கும் பணிகள் முன்னெடுக்கப்பட்டு வருகின்றன.குறித்த கட்டுமானப் பணிகளுக்காக நீர் எடுப்பதற்காக சிறுவனின் வீட்டின் வேலிக்கு அருகில் பாரிய குழி ஒன்று தோண்டப்பட்டிருந்ததாக தெரிவிக்கப்படுகிறது.குடியிருப்புப் பகுதிக்கு அருகில் இவ்வாறு பெரிய குழி தோண்டப்பட்டிருந்த போதிலும், அதனைச் சுற்றி உரிய பாதுகாப்பு ஏற்பாடுகள் மேற்கொள்ளப்படவில்லை என தெரிவிக்கப்படுகிறது.சம்பவத்தன்று முற்பகல் 11.00 மணியளவில் சிறுவன் தனது வீட்டின் வேலிக்கு அருகில் நடந்து சென்றுகொண்டிருந்தபோது, எதிர்பாராதவிதமாக குறித்த குழிக்குள் தவறி விழுந்துள்ளார்.சிறுவனை உடனடியாக மீட்டு கரடியனாறு வைத்தியசாலைக்கு கொண்டு சென்றபோதிலும், அவர் ஏற்கனவே உயிரிழந்துவிட்டதாக வைத்தியர்கள் தெரிவித்துள்ளனர்.சம்பவ இடத்துக்குச் சென்ற மரண விசாரணை அதிகாரி விசாரணைகளை மேற்கொண்டதுடன், சிறுவனின் சடலத்தை பார்வையிட்ட பின்னர் நீதிமன்ற நீதவானுக்கு அறிக்கை சமர்ப்பித்துள்ளார்.பிரேத பரிசோதனைக்கான நடவடிக்கைகள் முன்னெடுக்கப்பட்டுள்ள நிலையில், ஆயித்தியமலை பொலிஸார் மேலதிக விசாரணைகளை தொடர்ந்து வருகின்றனர்.இதனிடையே, பாலம் அமைக்கும் பணிகளின்போது உரிய பாதுகாப்பு ஏற்பாடுகள் மேற்கொள்ளப்படாததே இந்தச் சம்பவத்துக்கு காரணமாக இருக்கலாம் என அப்பகுதி மக்கள் மற்றும் மனித உரிமை செயற்பாட்டாளர்கள் கவலை வெளியிட்டுள்ளனர்.
மட்டக்களப்பில் பாதுகாப்பற்ற குழியில் தவறி விழுந்து 6 வயது சிறுவன் உயிரிழப்பு
