பயணத் தடை விதிக்கப்படுவதற்கு முன்னரே நாட்டை விட்டு வெளியேறிய பிரேமலால் ஜயசேகர

முன்னாள் இராஜாங்க அமைச்சர் பிரேமலால் ஜயசேகர, உச்ச நீதிமன்றம் அவருக்கு வெளிநாட்டுப் பயணத் தடை விதிப்பதற்கு முன்னரே நாட்டை விட்டு வெளியேறியுள்ளதாக பொலிஸார் தெரிவித்துள்ளனர்.இந்தத் தகவல் தொடர்பான விசாரணைகளை குற்றப் புலனாய்வுத் திணைக்களம் (CID) முன்னெடுத்தபோது தெரியவந்துள்ளதாக பொலிஸார் குறிப்பிட்டுள்ளனர்.2015ஆம் ஆண்டு ஜனாதிபதித் தேர்தலின்போது இடம்பெற்ற அரசியல் கூட்டத்தில் இடம்பெற்ற துப்பாக்கிச் சூட்டு சம்பவம் தொடர்பான வழக்கில், பிரேமலால் ஜயசேகர உள்ளிட்ட மூவருக்கு வெளிநாடு செல்ல தடை விதித்து உச்ச நீதிமன்றம் கடந்த செப்டெம்பர் 4ஆம் திகதி உத்தரவு பிறப்பித்திருந்தது.
பிரதம நீதியரசர் ப்ரீத்தி பத்மன் சூரசேன தலைமையிலான, நீதியரசர்களான அச்சல வெங்கப்புலி மற்றும் கிஹான் குலதுங்க ஆகியோர் அடங்கிய மூவரடங்கிய நீதியரசர் குழாம் இந்த உத்தரவை பிறப்பித்திருந்தது.மேலும், பயணத் தடை தொடர்பான உத்தரவை குடிவரவு மற்றும் குடியகல்வு கட்டுப்பாட்டாளர் நாயகத்துக்கு அறிவிக்குமாறும் நீதிமன்றம் உத்தரவிட்டிருந்தது.அத்துடன், பிரேமலால் ஜயசேகர உள்ளிட்ட மூவரும் 2026ஆம் ஆண்டு ஒக்டோபர் 21ஆம் திகதி நீதிமன்றில் முன்னிலையாகுமாறு அறிவித்தல் விடுக்கவும் நீதிமன்றம் உத்தரவிட்டிருந்தது.இதனையடுத்து, நீதிமன்ற உத்தரவு தொடர்பான சட்ட நடவடிக்கைகளை CID முன்னெடுத்தபோது, பிரேமலால் ஜயசேகர கடந்த ஓகஸ்ட் மாதமே வெளிநாடு சென்றிருந்தமை தெரியவந்துள்ளது.எனினும், அவர் நாட்டை விட்டு வெளியேறுவதற்கு முன்னரே மீண்டும் நாடு திரும்புவதற்கான விமானப் பயணச்சீட்டை ஏற்பாடு செய்திருந்ததாக CID தெரிவித்துள்ளது.2015ஆம் ஆண்டு ஜனாதிபதித் தேர்தலின்போது இடம்பெற்ற அரசியல் கூட்டத்தில் துப்பாக்கிச் சூடு நடத்தி ஒருவர் உயிரிழந்த சம்பவம் தொடர்பில் குற்றவாளியாகக் கண்டறியப்பட்ட பிரேமலால் ஜயசேகரவுக்கு இரத்தினபுரி மேல் நீதிமன்றம் மரண தண்டனை விதித்திருந்தது.இதனை எதிர்த்து பிரேமலால் ஜயசேகர உள்ளிட்டோர் தாக்கல் செய்த மேன்முறையீட்டை பரிசீலித்த மேன்முறையீட்டு நீதிமன்றம், அவர்களை விடுதலை செய்ய உத்தரவிட்டிருந்தது.இதற்கு எதிராக பாதிக்கப்பட்ட தரப்பினர் உச்ச நீதிமன்றத்தில் மேன்முறையீடு செய்தனர். மேன்முறையீட்டு நீதிமன்றத்தின் தீர்ப்பு சட்டத்திற்கு முரணானது எனக் குறிப்பிட்ட அவர்கள், அந்தத் தீர்ப்பை இரத்துச் செய்து உரிய தண்டனையை விதிக்குமாறு கோரியிருந்தனர்.இந்த மேன்முறையீடு விசாரணைக்கு எடுத்துக்கொள்ளப்பட்டபோது, பிரதம நீதியரசர் தலைமையிலான மூவரடங்கிய உச்ச நீதிமன்ற அமர்வு, முன்னதாக மரண தண்டனை விதிக்கப்பட்டு பின்னர் விடுதலை செய்யப்பட்ட பிரேமலால் ஜயசேகர உள்ளிட்ட மூவரும் வெளிநாடு செல்வதற்கு தடை விதித்து உத்தரவிட்டது.