சர்வதேச கிரிக்கெட்டில் 750 விக்கெட்டுகள் – புதிய மைல்கல்லை எட்டிய மிட்செல் ஸ்டார்க்

சர்வதேச கிரிக்கெட்டில் 750 விக்கெட்டுகளை வீழ்த்திய மூன்றாவது அவுஸ்திரேலிய வீரர் என்ற பெருமையை மிட்செல் ஸ்டார்க் பெற்றுள்ளார்.அவுஸ்திரேலியா – இங்கிலாந்து அணிகளுக்கு இடையிலான ஆஷஸ் டெஸ்ட் தொடர் விறுவிறுப்பாக நடைபெற்று வருகிறது.மொத்தம் 5 போட்டிகள் கொண்ட இந்த டெஸ்ட் தொடரில் இதுவரை மூன்று போட்டிகள் முடிந்துள்ள நிலையில், மூன்றிலும் அவுஸ்திரேலிய அணி அபார வெற்றியைப் பதிவு செய்து 3-0 என்ற கணக்கில் தொடரையும் வென்றுள்ளது. மேலும் ஆஷஸ் கிண்ணத்தையும் அந்த அணி கைப்பற்றி அசத்தியுள்ளது.
இந்த நிலையில், அவுஸ்திரேலிய அணியின் வேகப்பந்து வீச்சாளர் மிட்செல் ஸ்டார்க் இப்போட்டியில் மொத்தமாக 4 விக்கெட்டுகளை கைப்பற்றியதன் மூலம் சர்வதேச கிரிக்கெட்டில் தனது 750 விக்கெட்டுகளை பூர்த்தி செய்திருந்தார்.
இதன் மூலம் சர்வதேச கிரிக்கெட்டில் அவுஸ்திரேலிய அணிக்காக 750+ விக்கெட்டுகளை வீழ்த்திய மூன்றாவது வீரர் என்ற பெருமையை அவர் பெற்றுள்ளார்.இதற்கு முன் ஷேன் வார்னே மற்றும் கிளென் மெக்ராத் ஆகியோர் மட்டுமே இந்த சாதனையைப் படைத்திருந்தனர்.இதுதவிர்த்து சர்வதேச கிரிக்கெட்டில் அதிக விக்கெட்டுகளை வீழ்த்திய வீரர்கள் பட்டியலிலும் மிட்செல் ஸ்டார்க் 13ஆம் இடத்திற்கு முன்னேறியுள்ளார்.அவுஸ்திரேலிய அணிக்காக கடந்த 2010ஆம் ஆண்டு அறிமுகமான மிட்செல் ஸ்டார்க், ஒட்டுமொத்தமாக (ஒருநாள், டெஸ்ட் மற்றும் டி20) 298 போட்டிகளில் விளையாடி 750 விக்கெட்டுகளை வீழ்த்தியுள்ளார்.இதில் அவர் 27 முறை ஒரு இன்னிங்ஸில் 5 விக்கெட்டுகளையும், ஒரு போட்டியில் 3 முறை 10 விக்கெட்டுகளையும் வீழ்த்தியுள்ளார்.மேலும் 2015, 2023ஆம் ஆண்டு ஐ.சி.சி .ஒருநாள் உலகக்கிண்ண மற்றும் 2021ஆம் ஆண்டு டி20 உலகக்கிண்ணத்தை வென்ற அவுஸ்திரேலிய அணியில் முக்கிய பங்கு வகித்தார் என்பதும் குறிப்பிடத்தக்கது.