அமெரிக்காவில் பணவீக்கத்தைக் கட்டுப்படுத்தும் நோக்கில், மூன்று ஆண்டுகளுக்கும் மேலான இடைவெளிக்குப் பின்னர் முதல் முறையாக வட்டி விகிதத்தை பெடரல் ரிசர்வ் உயர்த்தியுள்ளது.பெடரல் ரிசர்வ் புதன்கிழமை ஒருமனதாக எடுத்த தீர்மானத்தில், அதன் முக்கிய வட்டி விகிதம் 3.50 முதல் 3.75 சதவீதம் என்ற நிலையிலிருந்து 3.75 முதல் 4 சதவீதமாக உயர்த்தப்பட்டது.பணவீக்கம் தொடர்ந்து உயர்ந்த நிலையில் இருப்பதே இந்த முடிவுக்கான முக்கிய காரணம் என பெடரல் ரிசர்வ் தலைவர் கெவின் வார்ஷ் தெரிவித்துள்ளார்.
“பணவீக்கம் அதிகமாக உள்ளது; நீண்ட காலமாகவே அதிகமாக இருந்து வருகிறது” எனக் குறிப்பிட்ட அவர், வட்டி உயர்வு ஒரு பொறுப்பான முடிவு என்றும் தெரிவித்துள்ளார்.எனினும், அமெரிக்க ஜனாதிபதி டொனால்ட் ட்ரம்ப் தொடர்ந்து வட்டி விகிதங்களைக் குறைக்க வேண்டும் என வலியுறுத்தி வந்த நிலையில் இந்த உயர்வு இடம்பெற்றுள்ளது.வட்டி உயர்வுக்குப் பின்னர் கருத்து தெரிவித்த ட்ரம்ப், கெவின் வார்ஷுக்கு தனது ஆதரவைத் தெரிவித்ததுடன், பெடரல் ரிசர்வ் நிர்வாகக் குழு “மிகவும் எதிர்ப்பானது” என்றும் விமர்சித்துள்ளார். முன்னதாக, அமெரிக்காவுக்கான வட்டி விகிதம் 1 சதவீதம் அல்லது அதற்கும் குறைவாக இருக்க வேண்டும் எனவும் அவர் தெரிவித்திருந்தார்.வட்டி விகிதங்கள் உயரும்போது வீட்டு கடன், தனிநபர் கடன் மற்றும் கடன் அட்டைகளுக்கான செலவுகள் அதிகரிக்கலாம். அதேவேளை, சேமிப்புகளுக்கு கிடைக்கும் வட்டி வருமானம் அதிகரிக்கும் வாய்ப்பும் உள்ளது.அமெரிக்காவில் பணவீக்கத்தை 2 சதவீத இலக்குக்குள் கொண்டு வருவதே பெடரல் ரிசர்வின் முக்கிய நோக்கமாக உள்ளது. தற்போதைய பணவீக்கம் அந்த இலக்கை விட தொடர்ந்து அதிகமாக இருப்பதாக வார்ஷ் தெரிவித்துள்ளார்.வட்டி விகிதத்தை உயர்த்துவதன் மூலம் மக்கள் மற்றும் நிறுவனங்கள் அதிகமாக கடன் பெறுவதையும் செலவிடுவதையும் கட்டுப்படுத்தி, சேமிப்பை ஊக்குவிப்பது பெடரல் ரிசர்வின் நோக்கமாகும். இதன் மூலம் பொருட்கள் மற்றும் சேவைகளின் விலை உயர்வின் வேகம் குறையும் என எதிர்பார்க்கப்படுகிறது.ஆனால், அதிக வட்டி விகிதங்கள் நிறுவனங்களின் முதலீடுகளை பாதித்து பொருளாதார வளர்ச்சியை மந்தப்படுத்தும் அபாயமும் உள்ளது.
அமெரிக்கர்களுக்கு ஏற்படக்கூடிய தாக்கம்
இந்த வட்டி உயர்வு புதிய வீடு வாங்குபவர்களுக்கான அடமானக் கடன் விகிதங்களில் தாக்கத்தை ஏற்படுத்தக்கூடும். ஏற்கனவே அமெரிக்காவில் 30 ஆண்டுகளுக்கான நிலையான அடமானக் கடன் வட்டி சராசரியாக 6.76 சதவீதமாகவும், 15 ஆண்டுகளுக்கானது 6.09 சதவீதமாகவும் உள்ளது.எனினும், ஏற்கனவே நிலையான வட்டி விகிதத்தில் வீட்டு கடன் பெற்றுள்ளவர்களின் மாதாந்திர தவணைகளில் உடனடி மாற்றம் ஏற்படாது. புதிய கடன் பெறுபவர்கள் அல்லது தங்களுடைய கடனை மறுநிதியீடு செய்ய விரும்புபவர்கள் அதிக செலவை எதிர்கொள்ள நேரிடலாம்.மேலும், JPMorgan, KeyCorp மற்றும் BNY உள்ளிட்ட முக்கிய அமெரிக்க வங்கிகள் தங்களது prime lending rate-ஐ 6.75 சதவீதத்திலிருந்து 7 சதவீதமாக உயர்த்தியுள்ளன. இதனால் கடன் அட்டைகள் மற்றும் தனிநபர் கடன்களின் வட்டி செலவுகளும் அதிகரிக்கலாம்.
மேலும் வட்டி உயருமா?
பெடரல் ரிசர்வின் புதிய கணிப்புகளின்படி, அதன் கொள்கை நிர்ணயிப்பவர்களில் 18 பேரில் 16 பேர் இந்த ஆண்டின் இறுதிக்குள் குறைந்தது மேலும் ஒரு வட்டி உயர்வு இடம்பெறலாம் என எதிர்பார்க்கின்றனர்.அதன்படி, வட்டி விகிதம் 4 முதல் 4.25 சதவீதம் வரை செல்லக்கூடும் என கணிக்கப்பட்டுள்ளது.பின்னர் பணவீக்கம் படிப்படியாக குறைந்து, 2029ஆம் ஆண்டுக்குள் பெடரல் ரிசர்வின் 2 சதவீத இலக்கை அடையும் என அதிகாரிகளின் கணிப்புகள் தெரிவிக்கின்றன.மத்திய கிழக்கில் ஏற்பட்டுள்ள போர் மற்றும் எண்ணெய் விலை உயர்வு உள்ளிட்ட காரணிகளும் அமெரிக்க பணவீக்கத்தில் தாக்கத்தை ஏற்படுத்தி வரும் நிலையில், அடுத்தடுத்த வட்டி விகித முடிவுகள் பொருளாதாரத்திலும் அமெரிக்க குடும்பங்களின் கடன் செலவுகளிலும் முக்கிய தாக்கத்தை ஏற்படுத்தும் என எதிர்பார்க்கப்படுகிறது.
