டிஜிட்டல் காப்புறுதி அட்டைகளை ஏற்க மறுத்து வாகன சாரதிகளுக்கு அசௌகரியத்தை ஏற்படுத்தும் பொலிஸ் அதிகாரிகளின் செயற்பாடு கடமையில் பாரிய தவறாகும் என போக்குவரத்து கட்டுப்பாடு மற்றும் வீதி பாதுகாப்பு பிரிவின் பிரதி பொலிஸ் மா அதிபர் டபிள்யூ.பி.ஜே. சேனாதீர தெரிவித்துள்ளார்.இன்று (03) நடைபெற்ற ஊடகவியலாளர் சந்திப்பில் அவர் இதனைத் தெரிவித்துள்ளார்.பதுக்கை மற்றும் கம்பஹா பொலிஸ் நிலையங்களில் கடமையாற்றும் சில அதிகாரிகள் டிஜிட்டல் காப்புறுதி அட்டைகளை ஏற்க மறுத்து பொதுமக்களுக்கு அசௌகரியத்தை ஏற்படுத்தியுள்ளதாக முறைப்பாடுகள் கிடைத்துள்ளதாகவும் அவர் குறிப்பிட்டார்.இதனையடுத்து, 2026 மே 5ஆம் தேதி வெளியிடப்பட்ட RTM 93 சட்டத்தின் கீழான அறிவுறுத்தலின்படி, காப்புறுதி ஒழுங்குமுறை ஆணைக்குழுவினால் அங்கீகரிக்கப்பட்ட நாட்டின் முன்னணி 14 காப்புறுதி நிறுவனங்கள் வழங்கும் டிஜிட்டல் காப்புறுதி அட்டைகளை அனைத்து பொலிஸ் நிலையங்களும் ஏற்றுக்கொள்ள வேண்டும் என பொலிஸ் மா அதிபர் அறிவுறுத்தியுள்ளதாக அவர் தெரிவித்தார்.மேலும்,2006ஆம் ஆண்டின் 19ஆம் இலக்க இலத்திரனியல் கொடுக்கல் வாங்கல் சட்டத்தின் கீழ் டிஜிட்டல் காப்புறுதி அட்டைகளுக்கு முழுமையான சட்ட அங்கீகாரம் இருப்பதாகவும் பிரதி பொலிஸ் மா அதிபர் தெரிவித்தார்.ஒரு சாரதியிடம் டிஜிட்டல் காப்புறுதி அட்டை இல்லாவிட்டாலும், அந்த வாகனத்துக்கு செல்லுபடியாகும் காப்புறுதி உள்ளதா என்பதை பொலிஸாரால் இலவசமாக பல வழிகளில் சரிபார்க்க முடியும் என்றும் அவர் விளக்கினார்.
காப்புறுதி தகவல்களை சரிபார்க்கும் வழிகள்:
* `*1338#` என டயல் செய்து காப்புறுதி இலக்கத்தை அல்லது வாகனப் பதிவு இலக்கத்தை உள்ளிடுதல்.
* `1338` என்ற இலக்கத்திற்கு SMS அனுப்புதல்.
* `1338` அவசர தொலைபேசி சேவை அழைப்பு மையத்தை தொடர்புகொள்ளுதல்.
இதனிடையே, நாடளாவிய ரீதியில் உள்ள 607 பொலிஸ் நிலையங்களின் பொறுப்பதிகாரிகள் (OIC) ஊடாக கீழ்மட்ட பொலிஸ் அதிகாரிகளுக்கு இது தொடர்பான மீள்பயிற்சியும் விழிப்புணர்வு நடவடிக்கைகளும் முன்னெடுக்கப்படவுள்ளதாக தெரிவிக்கப்பட்டுள்ளது.
டிஜிட்டல் காப்புறுதி அட்டையை பொலிஸ் அதிகாரி ஒருவர் ஏற்க மறுத்தால், அருகிலுள்ள பொலிஸ் நிலையத்தின் பொறுப்பதிகாரியிடம் முறைப்பாடு செய்யுமாறும் அல்லது போக்குவரத்து தலைமையகத்தின் விசேட தொலைபேசி இலக்கமான 070 475 5600 என்ற இலக்கத்தை தொடர்புகொள்ளுமாறும் பொதுமக்களிடம் கோரிக்கை விடுக்கப்பட்டுள்ளது.வழங்கப்பட்டுள்ள அறிவுறுத்தல்களை பின்பற்றத் தவறும் பொலிஸ் அதிகாரிகளுக்கு எதிராக கடுமையான ஒழுக்காற்று நடவடிக்கை எடுக்கப்படும் என பிரதி பொலிஸ் மா அதிபர் டபிள்யூ.பி.ஜே. சேனாதீர மேலும் தெரிவித்துள்ளார்.
