பாடசாலை நேரம் மாற்றப்படுகிறதா? மூடப்படும் பாடசாலைகள் குறித்து கல்வி அமைச்சு விளக்கம்

நாட்டில் எந்தவொரு அரச பாடசாலையையும் தன்னிச்சையாக மூடுவதற்கு அரசாங்கம் நடவடிக்கை எடுக்கவில்லை என அமைச்சரவைப் பேச்சாளரும் அமைச்சருமான நளிந்த ஜயதிஸ்ஸ தெரிவித்துள்ளார்.மாணவர் எண்ணிக்கை தொடர்ந்து குறைந்து வரும் பாடசாலைகள் தொடர்பில் மாத்திரமே அறிவியல் பூர்வமான ஆய்வுகள் மேற்கொள்ளப்பட்டு வருவதாகவும் அவர் குறிப்பிட்டுள்ளார்.அமைச்சரவைத் தீர்மானங்களை அறிவிக்கும் ஊடகவியலாளர் சந்திப்பில், பாடசாலைகளை மூடுதல், கல்வி மறுசீரமைப்பு மற்றும் பாடசாலை நேர மாற்றம் தொடர்பில் எழுப்பப்பட்ட கேள்விகளுக்கு பதிலளிக்கையிலேயே அமைச்சர் இதனைத் தெரிவித்துள்ளார்.எந்தவொரு பாடசாலையையும் உடனடியாக மூடும் திட்டம் அரசாங்கத்திடம் இல்லை எனத் தெரிவித்த அவர், கடந்த பல வருடங்களாக மாணவர்களின் எண்ணிக்கை தொடர்ச்சியாகக் குறைந்து வரும் பாடசாலைகள் தொடர்பிலேயே கவனம் செலுத்தப்படுவதாகவும் கூறினார்.

60 அல்லது 70 ஆண்டுகளுக்கு முன்னர் அமைக்கப்பட்ட சில பாடசாலைகளின் அமைவிடங்களும், தற்போதைய மக்கள் தொகைப் பரம்பலும் முற்றிலும் மாறுபட்டுள்ளதாகவும் அமைச்சர் சுட்டிக்காட்டினார்.மாணவர்களின் எண்ணிக்கை மிகவும் குறைவாக உள்ள பாடசாலைகள் தொடர்பில் கோட்ட மற்றும் வலய மட்டங்களில் அறிக்கைகள் கோரப்பட்டு, அவற்றின் அடிப்படையில் ஆய்வுகள் முன்னெடுக்கப்பட்டு வருவதாகவும் அவர் தெரிவித்தார்.பாடசாலைகளை வெறுமனே திறந்து வைத்திருப்பதைவிட, நாட்டிலுள்ள ஒவ்வொரு குழந்தைக்கும் தரமான மற்றும் போதுமான வசதிகளுடன் கூடிய கல்வியை உறுதி செய்வதே அரசாங்கத்தின் பிரதான நோக்கம் என நளிந்த ஜயதிஸ்ஸ தெரிவித்துள்ளார்.இதனிடையே, கல்வி அமைப்பில் நிலவும் ஆசிரியர் பற்றாக்குறைக்கு தீர்வாக 3,000 புதிய ஆசிரியர்களை மிக விரைவில் கல்வி சேவையில் இணைத்துக்கொள்ள நடவடிக்கை எடுக்கப்பட்டு வருவதாகவும் அமைச்சர் தெரிவித்தார்.இதன் மூலம் ஆசிரியர் பற்றாக்குறைக்கு கணிசமான தீர்வு கிடைக்கும் எனவும் அவர் குறிப்பிட்டார்.கல்வி மறுசீரமைப்பு என்பது பாடத்திட்டங்களை மாற்றுவதுடன் மாத்திரம் மட்டுப்படுத்தப்படாது எனவும் அமைச்சர் விளக்கமளித்தார்.பாடசாலைகளுக்குத் தேவையான பௌதிக மற்றும் மனித வளங்களை வழங்குதல், கல்வி நிர்வாகக் கட்டமைப்பில் சீர்திருத்தங்களை மேற்கொள்ளுதல் மற்றும் மதிப்பீட்டு முறைகளை நவீனமயமாக்குதல் உள்ளிட்ட பல்வேறு அம்சங்களையும் கல்வி மறுசீரமைப்பு உள்ளடக்கும் என அவர் தெரிவித்தார்.இதற்கமைய, 2027ஆம் ஆண்டளவில் 1, 2 மற்றும் 6ஆம் தரங்களுக்கான புதிய பாடத்திட்ட மறுசீரமைப்புகள் நடைமுறைப்படுத்தப்படும் எனவும் நளிந்த ஜயதிஸ்ஸ கூறினார்.அதேவேளை, பாடசாலைகள் ஆரம்பிக்கும் மற்றும் முடிவடையும் நேரத்தை மாற்றுவது தொடர்பில் கல்வி அமைச்சினால் தயாரிக்கப்பட்டுள்ள அறிக்கைகள் குறித்து இதுவரை எந்தவொரு கலந்துரையாடலும் இடம்பெறவில்லை எனவும் அமைச்சர் தெரிவித்தார்.எதிர்காலத்தில் இது தொடர்பில் கல்வி அமைச்சு ஏதேனும் தீர்மானத்தை எடுத்தால், அது முறைப்படி அறிவிக்கப்படும் எனவும் அவர் மேலும் குறிப்பிட்டார்.