ஈஸ்டர் தாக்குதல் வழக்கில் 15 பேரின் சொத்துகளை அரசுடைமையாக்க உத்தரவு

2019ஆம் ஆண்டு ஈஸ்டர் ஞாயிறு பயங்கரவாதத் தாக்குதல் தொடர்பான பிரதான வழக்கில் குற்றவாளிகளாகத் தீர்ப்பளிக்கப்பட்ட 15 பேருக்கும் சொந்தமான அசையும் மற்றும் அசையா சொத்துக்களை அரசுடைமையாக்க கொழும்பு நிரந்தர உயர் நீதிமன்ற Trial-at-Bar உத்தரவிட்டுள்ளது.மூவரடங்கிய நீதிபதிகள் குழுவினால் இந்த உத்தரவு பிறப்பிக்கப்பட்டதுடன், 15 பேருக்கும் கடுமையான சிறைத்தண்டனையும் விதிக்கப்பட்டுள்ளது.நீதிமன்றத் தீர்ப்பின்படி, ஐந்து குற்றவாளிகளுக்கு தலா 200 ஆண்டுகள் கடூழிய சிறைத்தண்டனையும், மேலும் ஐந்து பேருக்கு தலா 220 ஆண்டுகள் சிறைத்தண்டனையும் விதிக்கப்பட்டுள்ளன.மேலும் நான்கு பேருக்கு தலா 240 ஆண்டுகள் சிறைத்தண்டனையும், மற்றொரு குற்றவாளிக்கு 260 ஆண்டுகள் கடூழிய சிறைத்தண்டனையும் விதிக்கப்பட்டுள்ளது.
ஈஸ்டர் ஞாயிறு தாக்குதல்களை நடத்த சதி செய்தல், தாக்குதல்களுக்கு உதவுதல் மற்றும் உடந்தையாக செயற்பட்டமை, தீவிரவாத நடவடிக்கைகளில் ஈடுபட்டமை உள்ளிட்ட பல்வேறு குற்றச்சாட்டுகள் இந்த வழக்கில் முன்வைக்கப்பட்டிருந்தன.2019ஆம் ஆண்டு ஏப்ரல் 21ஆம் திகதி இலங்கையின் பல பகுதிகளில் தேவாலயங்கள் மற்றும் ஹோட்டல்களை இலக்கு வைத்து தொடர் தற்கொலைக் குண்டுத் தாக்குதல்கள் நடத்தப்பட்டன. இந்தத் தாக்குதல்களில் 260க்கும் மேற்பட்டோர் உயிரிழந்ததுடன், நூற்றுக்கணக்கானோர் காயமடைந்தனர்.
இந்தச் சம்பவம் தொடர்பான பிரதான வழக்கில் 24 பேருக்கு எதிராக மொத்தம் 23,270 குற்றச்சாட்டுகள் தாக்கல் செய்யப்பட்டிருந்தன. கொலை, கொலை முயற்சி, பயங்கரவாதச் சதி, தாக்குதல்களுக்கு உதவுதல் மற்றும் துப்பாக்கிகள், வெடிபொருட்கள் உள்ளிட்டவற்றுடன் தொடர்புடைய குற்றச்சாட்டுகளும் இதில் அடங்குகின்றன.நீதிமன்ற விசாரணையின் முடிவில் 24 பேரில் 15 பேர் குற்றவாளிகளாக அறிவிக்கப்பட்டதுடன், ஏனைய ஒன்பது பேரும் விடுதலை செய்யப்பட்டனர்.இந்த நீண்டகால வழக்கின் தீர்ப்பு 2026 செப்டம்பர் 22ஆம் திகதி வழங்கப்பட்டது. மூவரடங்கிய நீதிபதிகள் குழுவில் நவரத்ன மாரசிங்க, ராமநாதன் கண்ணன் மற்றும் சுஜீவ நிஷங்க ஆகிய உயர் நீதிமன்ற நீதிபதிகள் இடம்பெற்றிருந்தனர்.