யேமனில் செயல்பட்டு வரும் ஈரான் ஆதரவு ஹூதி அமைப்பு, சவுதி அரேபிய தலைநகர் ரியாத் மற்றும் செங்கடல் கரையோரத்தில் உள்ள எரிசக்தி நிலையங்களை இலக்குவைத்து ஏவுகணைகள் மற்றும் ட்ரோன்கள் மூலம் தாக்குதல் நடத்தியதாக தெரிவித்துள்ளது.
ஹூதி இராணுவப் பேச்சாளர் யஹ்யா அல்-சரீ வெளியிட்ட அறிக்கையில், ரியாதில் உள்ள முக்கியமான இடங்களையும், யன்பு நகரில் உள்ள சவுதி அரசின் எண்ணெய் நிறுவனமான அராம்கோவின் எரிசக்தி வசதிகளையும் இலக்குவைத்து ஏராளமான பாலிஸ்டிக் மற்றும் க்ரூஸ் ஏவுகணைகள், ட்ரோன்கள் பயன்படுத்தப்பட்டதாகக் கூறியுள்ளார்.எனினும், சவுதி அதிகாரிகள் ரியாத் நோக்கி ஏவப்பட்ட ஒரு பாலிஸ்டிக் ஏவுகணையை வான்பாதுகாப்பு அமைப்புகள் இடைமறித்து அழித்ததாகத் தெரிவித்துள்ளனர். மேலும், பிஷா, தாயிஃப், ஃபரசான் மற்றும் யன்பு ஆகிய பகுதிகளை இலக்குவைக்க மேற்கொள்ளப்பட்ட முயற்சிகளும் முறியடிக்கப்பட்டதாக சவுதி தலைமையிலான கூட்டணியின் பேச்சாளர் தெரிவித்துள்ளார்.இதற்கிடையில், ரியாத் கிங் காலித் சர்வதேச விமான நிலையம் அருகே எரிபொருள் சேமிப்பு தொட்டிகள் அமைந்துள்ள பகுதியில் இருந்து கரும்புகை எழுந்ததாக Reuters செய்தியாளர்கள் தெரிவித்துள்ளனர். அப்பகுதியில் தீப்பிழம்புகளும் காணப்பட்டதாக Reuters காட்சிகள் தெரிவிக்கின்றன. சம்பவத்துக்கான துல்லியமான காரணம் குறித்து சவுதி அதிகாரிகள் உடனடியாக உறுதிப்படுத்தவில்லை.இந்தச் சம்பவத்தால் கிங் காலித் சர்வதேச விமான நிலையத்தில் சில விமானங்கள் தாமதமாகியதுடன், சில விமான சேவைகள் இரத்து செய்யப்பட்டதாக தகவல்கள் வெளியாகியுள்ளன.ரியாத் நகரில் வான்வழித் தாக்குதல் எச்சரிக்கை விடுக்கப்பட்டதும் குறிப்பிடத்தக்கது. ஹூதிகள் சவுதி அரேபியாவுக்கு எதிரான தாக்குதல்களை தீவிரப்படுத்திய பின்னர், ரியாதில் இவ்வாறான எச்சரிக்கை விடுக்கப்படுவது இதுவே முதல் முறையாகும்.
அமெரிக்கா பயண எச்சரிக்கை
மத்திய கிழக்கில் உள்ள அமெரிக்கர்கள் எச்சரிக்கையுடன் இருக்குமாறும், விமான சேவைகள் இரத்து செய்யப்படுதல் உள்ளிட்ட பயண இடையூறுகளுக்கு தயாராக இருக்குமாறும் அமெரிக்க வெளியுறவுத்துறை அறிவுறுத்தியுள்ளது.ஹூதிகள் சவுதி அரேபியாவில் பொதுமக்கள் பயன்படுத்தும் விமான நிலையங்கள் உள்ளிட்ட இலக்குகளை தாக்கியுள்ளதாகவும், இந்த இராணுவ மோதல் வேகமாக தீவிரமடையக்கூடும் என்றும் அமெரிக்க வெளியுறவுத்துறை தெரிவித்துள்ளது.
யேமனில் தொடரும் மோதல்
சவுதி ஆதரவு பெற்ற யேமன் அரசுக்கும் ஹூதி அமைப்புக்கும் இடையிலான மோதல் தொடர்ந்து இடம்பெற்று வருகிறது. சமீப வாரங்களில் ஹூதிகள் சவுதி அரேபியாவின் பல பகுதிகளை இலக்குவைத்து தாக்குதல்களை நடத்தியுள்ளதாகவும், அதற்கு பதிலடியாக சவுதி தரப்பில் யேமனில் தாக்குதல்கள் நடத்தப்பட்டுள்ளதாகவும் தகவல்கள் வெளியாகியுள்ளன.இந்த மோதல் செங்கடல் மற்றும் பாப் அல்-மந்தப் நீரிணை வழியாக செல்லும் எண்ணெய் மற்றும் சரக்கு கப்பல் போக்குவரத்துக்கும் அச்சுறுத்தலை ஏற்படுத்தியுள்ளது. இதனால் உலகளாவிய எண்ணெய் விநியோகம் மற்றும் விலைகள் தொடர்பிலும் கவலை அதிகரித்துள்ளது.யேமனில் சமீபத்திய மோதல்களால் ஒரு இலட்சத்துக்கும் மேற்பட்டோர் இடம்பெயர்ந்துள்ளதாக ஐ.நா. அமைப்புகள் தெரிவித்துள்ளன.
